बारावीनंतर घ्या सरकारी नोकरी

सरकारी नोकरी मिळवणं हे आजही अनेक मराठी मुलांसाठी एक स्वप्न असतं. केंद्र सरकारच्या विविध खात्यांमध्ये स्टाफ सिलेक्शन कमिशनमार्फत भरती होत असते. याबाबतच्या जाहिराती वेळोवेळी निघत असतात. स्टाफ सिलेक्शन कमिशनमार्फत केंद्र सरकारच्या विविध आस्थापनांमध्ये डेटा एंट्री ऑपरेटर व लोअर डिव्हिजन क्लार्कसाठी भरती केली जाते. यासाठी कम्बाईन्ड हायर सेकंडरी लेव्हल एक्झामिनेशन २०१४ ची जाहिरात नुकतीच प्रकाशित झाली आहे. वरील पदावर नियुक्त झालेल्या उमेदवारांना काही वर्षांनी विभागीय परीक्षा देऊन उच्च पदावर अधिकारी म्हणूनही कामाच्या संधी उपलब्ध होतात .

शैक्षणिक पात्रता - मान्यताप्राप्त बोर्डातून बारावी उत्तीर्ण विद्यार्थी

वयोमर्यादा - १८ ते २७ वर्षे.

प्रवेश अर्ज भरण्याची अंतिम मुदत : १९ ऑगस्ट २०१४

परीक्षा फी : १०० रुपये ( महिला तसेच एस.सी., एस.टी. व अपंग उमेदवारांना फी नाही )

परीक्षा दिनांक - २ व ९ नोव्हेंबर २०१४

विद्यार्थी प्रवेश अर्ज संबंधित विभागीय ऑफिसमध्ये अर्ज पाठवू शकतात किंवा ऑनलाइन अर्ज भरू शकतात . परीक्षेसाठी केवळ एकच अर्ज पाठवावा. महाराष्ट्राचे विभागीय केंद्र मुंबई येथे असून परीक्षा केंद्रे औरंगाबाद , मुंबई , कोल्हापूर , नागपूर , पुणे , नाशिक , अमरावती येथे आहेत .

निवड प्रक्रिया -

उमेदवारांची निवड लेखी परीक्षा, स्कील टेस्ट (डेटा एन्ट्री ऑपरेटरसाठी), टायपिंग टेस्ट (लोअर डिव्हिजन क्लर्कसाठी) द्वारे केली जाते

लेखी परीक्षा-

लेखी परीक्षा २०० गुणांची असून प्रश्नपत्रिकेचे स्वरुप वस्तुनिष्ठ बहुपर्यायी असते. कालावधी २ तासांचा असतो. प्रश्नपत्रिका इंग्रजी व हिंदी माध्यमातून उपलब्ध असतील. लेखी परीक्षेत चार विषयावर प्रत्येकी ५० गुणांचे प्रश्न विचारले जातात. चुकीच्या उत्तरासाठी एक चतुर्थांश गुण वजा केले जातात.

विषय

१)सामान्य बुध्दीमापन २) इंग्रजी भाषा ३) क्वांटिटेटिव्ह अॅप्टिटयुड ४) सामान्य ज्ञान

स्कील टेस्ट-

डेटा एन्ट्री ऑपरेटरसाठी स्कील टेस्ट घेतली जाते. लेखी परीक्षेत निवड झालेल्या उमेदवारांना स्कील टेस्टसाठी बोलावले जाते. स्कील टेस्टमध्ये १५ मिनिटे इंग्रजी भाषेत टायपिंग करायला सांगितले जाते. टायपिंगचा वेग तासाला ८००० की डिप्रेशन इतका असणे आवश्यक आहे. या टेस्टमध्ये केवळ उत्तीर्ण होणे आवश्यक आहे. यासाठी वेगळे गुण दिले जात नाहीत.

टायपिंग टेस्ट -

लोअर डिव्हिजन क्लार्कसाठी लेखी परीक्षेत निवड झालेल्या उमेदवारांना टायपिंगच्या परीक्षेसाठी बोलावले जाते. टायपिंग टेस्ट हिंदी किंवा इंग्रजी भाषेत घेतली जाते. इंग्रजी भाषेतल्या टायपिंगचा वेग ३५ शब्द प्रती मिनिट तर हिंदी भाषेतील टायपिंगचा वेग ३० शब्द प्रति मिनिट इतका असणे आवश्यक आहे. टायपिंगची परीक्षा संगणकावर घेतली जाते यामध्ये १० मिनिटे दिलेल्या उताऱ्याचे टायपिंग करायचे असते.

या परीक्षेच्या अधिक माहितीसाठी http://ssc.nic.in ही वेबसाईट पहावी.