जॉब सर्च झाला स्मार्ट
ट्विटर इंडिया कंपनीच्या टीमने मुंबईत नोकरीसाठी उमेदवारांना ट्विटरवर पोस्ट करून अर्ज करण्यास सांगितले आहे. अलीकडे उबर कॅब आणि ट्विटर इंडियासारख्या कंपन्या आपल्या वेबसाइटवर जॉबच्या जाहिराती न देता किंवा पारंपरिक भरती करणाऱ्या कंपन्यांची मदत न घेता कस्टमर किंवा फॉलोअर्सना ई-मेल किंवा ट्विट्स पाठवून जॉबसाठी बोलावत आहेत; पण जोपर्यंत तुम्ही ट्विटरवर नेमक्या लोकांना 'फॉलो' करत नाही किंवा त्यांच्या मेलिंग लिस्टमध्ये येत नाही, तोपर्यंत तुम्हाला या जॉब्सची माहिती होणार नाही.
'Team@Twitterindia एका असोसिएट पार्टनरशिप्स मॅनेजरच्या शोधात आहे, जो आमच्या बरोबर काम करू शकेल,' असा संदेश ट्विटर इंडियाच्या टीमने ट्विटरवरून पाठविलेला आहे.
'उबर कॅब'ची वेगळी वाट
उबर कॅब कंपनीही मॅनेजरच्या जॉबसाठी योग्य उमेदवराच्या शोधात आहे; परंतु त्यासाठी कंपनीने पारंपरिक मार्ग सोडून वेगळी वाट चोखाळण्याचा निर्णय घेतला आहे. दिल्लीमध्ये उमेदवारांना ई-मेल पाठवून त्यात म्हटले आहे, की आपण डाटा, अॅनलिटिक्स, वर्ल्ड क्लास सपोर्ट आणि कल्पक धोरणांच्या मदतीने (क्रिएटिव्ह स्ट्रॅटेजी) आपल्या शहराचा कारभार चालविण्यास उत्सुक असाल, तर या, आमच्याबरोबर काम करा.
कंपनीचे दिल्लीतील जनरल मॅनेजर गगन भाटिया यांनी म्हटले आहे, 'ज्यांनी त्यांच्या सेवा-सुविधांचा उपयोग केला आहे, असे उमेदवार त्यांच्यासाठी योग्य आहेत. हे लोक स्थानिक आहेत.' भाटिया यांच्या मते, 'भरती प्रक्रियेसाठी ही अतिशय उपयुक्त पद्धत आहे. गेल्या वर्षभरात अशा भरती प्रक्रियेला चांगलाच वेग आला आहे.'
'इंटर अॅक्टिव्ह'चे संस्थापक आणि मुख्य कार्यकारी अधिकारी जफर रईस म्हणतात, 'ही एक जलद प्रक्रिया असून, त्यामुळे उमेदवारांबाबत काही संशोधन करून त्यातून त्यांची निवड यादी तयार करण्यास मदत मिळते. आम्ही सुला विनयार्ड्स आणि 'लॉरियल'सारख्या ग्राहकांना कनिष्ठ ते मध्यम आणि वरिष्ठ स्तरापर्यंतचे एक्झिक्युटिव्ह्ज शोधण्यासाठी मदत करतो.'
रईस यांच्या मते, 'ट्विटरवर दर महिन्याला साधारण २० लाख जॉब पोस्ट केल्या जातात आणि ३९ टक्के जॉबच्या शोधात असलेले ट्विटरवर येतात. २३ टक्के उमेदवारांनी जॉब शोधण्यासाठी ट्विटरची मदत घेतली आहे. ५०० कंपन्यांपैकी ४५ टक्के कंपन्यांनी आपल्या करिअर पेजेसवर सोशल मीडियाच्या लिंक शेअर केल्या आहेत, तर ४५ टक्के मॅनेजर उमेदवारांची माहिती मिळविण्यासाठी सोशल मीडिया वेबसाइट्सचा वापर करतात. लिंक्ड-इन, फेसबुक, ट्विटर, गुगल प्लस आणि ब्रांच आउट या सध्या सोशल मीडिया किंवा सोशल नेटवर्किंग साइट्समध्ये सर्वांत लोकप्रिय आहेत. याबरोबरच उमेदवारही अधिक सतर्क होत आहेत. ते सोशल मीडियावर ब्रँडशी जोडले जात आहेत. एक्झिक्युटिव्हना पडताळून पाहून ते जॉबची संधी मिळवित आहेत. एअरसेल, कॉग्निजंट टेक्नॉलॉजी सोल्युशन्स, एक्सपीडिया आणि एचसीएल टेक्नॉलॉजी या कंपन्या अधिक करून सोशल मीडियाच्या माध्यमातून भरती प्रक्रिया चालवतात. यामध्ये असलेल्या आणखी काही मोठ्या नावांमध्ये इन्फोसिस आणि टाटाही आहेत. सोशल ह्युमन रिसोर्सचा वापर या कंपन्या उमेदवारांच्या भरती प्रक्रियेमध्ये करतात.
No comments:
Post a Comment